Radio Wave 108 FM sjell një risi të pazakontë në tregun mediatik shqiptar, duke prezantuar për herë të parë tre prezantues të krijuar me inteligjencë artificiale. Hana, Toska dhe Dardani janë pjesë e sezonit të ri të radios, në një koncept që synon të ndryshojë mënyrën se si përjetohet radioja. Radio Wave 108 FM po hap një kapitull të ri në historinë e saj, duke e vendosur teknologjinë dhe inteligjencën artificiale në qendër të sezonit të ri. Risia më e veçantë është krijimi i një universi me prezantues AI, një koncept që mbetet ende tepër i rrallë edhe në arenën ndërkombëtare.

HANA

Sipas konceptit të ri të Wave, vetëm pak radio në Europë kanë eksperimentuar me prezantues AI si pjesë të rregullta të programacionit. Në këtë kontekst, prania e tre prezantuesve AI në një radio shqiptare përbën një hap të veçantë për tregun vendas. Hana, Toska dhe Dardani nuk janë konceptuar thjesht si zëra artificialë që lexojnë tekste apo prezantojnë këngë. Ata janë krijuar si personazhe me identitet, stil dhe mënyrë të veçantë komunikimi, duke synuar të krijojnë një marrëdhënie të re me dëgjuesin.Përmes tyre, Radio Wave po eksperimenton me një mënyrë krejt të re të të bërit radio, ku inteligjenca artificiale ndërthuret me muzikën, humorin, informacionin dhe argëtimin.

TOSKA 

Risia nuk ndalet vetëm te prezantuesit. Sezoni i ri i Radio Wave vjen me një identitet të rinovuar, formate të reja, teknologji të avancuar dhe një eksperiencë tërësisht të re online. Synimi është që radioja të mos shihet më vetëm si një frekuencë FM, por si një ekosistem mediatik dhe digjital.Pas Hanës, Toskës dhe Dardanit, pritet që universi i prezantuesve AI të zgjerohet edhe me personazhe të tjerë gjatë sezonit të ri.Ky transformim teknologjik po zhvillohet në kuadër të programit të granteve Start Up Albania, me mbështetjen e Ministrisë së Ekonomisë dhe Inovacionit.

DARDANI

Me këtë projekt, Radio Wave synon të pozicionohet në pararojë të inovacionit në median shqiptare, duke sjellë në mikrofon një teknologji që ende është në fazat e para të eksperimentimit edhe në Europë. E ardhmja e radios duket se nuk do të ketë vetëm zëra njerëzorë. Dhe Radio Wave ka vendosur ta sjellë këtë të ardhme në Shqipëri.