Reperi shqiptar Cllevio raportohet se është ndaluar nga autoritetet italiane në aeroportin Malpensa të Milanos, teksa ishte duke udhëtuar drejt Zvicrës, ku pritej të performonte.

Lajmin e ka bërë të ditur vetë Cllevio përmes rrjeteve sociale, ku ka publikuar pamje që duket se janë realizuar brenda aeroportit. Në pamje shihen valixhet e tij, ndërsa reperi ka bërë të ditur se ndodhet në pritje të procedurave të mëtejshme nga autoritetet.

Situata duket se ka ndikuar drejtpërdrejt edhe në angazhimin e tij në Zvicër. Cllevio ka kërkuar falje për fansat, duke lënë të kuptohet se nuk do të mund të jetë i pranishëm në koncertin e planifikuar në Rinora 4.

Megjithatë, deri në këto momente nuk është bërë e ditur zyrtarisht arsyeja konkrete e ndalimit. Autoritetet italiane nuk kanë dhënë detaje publike lidhur me rastin, ndaj çdo pretendim për një çështje të mundshme ligjore mbetet i pakonfirmuar.

Ngjarja ka shkaktuar reagime të shumta në rrjetet sociale, ndërsa fansat e reperit janë në pritje të një informacioni të ri. Ende nuk dihet nëse Cllevio është liruar apo nëse do të përballet me procedura të mëtejshme.

Pritet që në orët në vijim të ketë më shumë qartësi rreth situatës dhe arsyes së ndalimit të tij në aeroportin e Milanos.