Ish-banorja e “Big Brother VIP Albania”, Rizarta Hoxha, është kthyer në një nga emrat më të komentuar të mediave rozë gjatë ditëve të fundit, pas disa publikimeve që kanë shkaktuar debat të madh në rrjetet sociale.

Gjithçka nisi pas publikimit të një fotografie nga një aeroport gjatë një udhëtimi në Spanjë, ku Rizarta dyshohej se ndodhej në shoqërinë e fituesit të “Big Brother Albania 1”, Arbër Çepani. Edhe pse fytyrat nuk shfaqeshin qartë, detaje të veshjes së tyre nxitën aludimet se dy personazhet mund të kishin qenë së bashku, duke bërë që menjëherë të lindnin spekulime për një lidhje të mundshme mes tyre.

Vëmendja ndaj kësaj historie u shtua edhe më shumë pas një publikimi tjetër nga gazetari Elton Tozaj, i cili ndau një video ku Rizarta shfaqej në një moment intim me një djalë tjetër.

Publikimi nxiti reagime dhe diskutime të shumta në rrjetet sociale, ndërsa vetë gazetari ngriti pyetjen nëse pamjet i përkisnin një periudhe para apo pas udhëtimit të përfolur në Spanjë.

Pas gjithë bujës së krijuar, Rizarta Hoxha ka reaguar për herë të parë publikisht përmes një postimi në “InstaStory”.

Ajo është shprehur se situata, sipas saj, ka kaluar kufijtë e raportimit dhe përbën një cenim të rëndë të jetës së saj private. Rizarta ka theksuar gjithashtu se statusi i një figure publike nuk e privon një person nga të drejtat ligjore dhe se kurioziteti i publikut nuk mund të barazohet automatikisht me interesin publik.

Në reagimin e saj, ajo i është referuar dispozitave ligjore që lidhen me mbrojtjen e jetës private dhe të të dhënave personale, përfshirë nenin 625 të Kodit Civil, Ligjin për Mbrojtjen e të Dhënave Personale dhe nenin 8 të Konventës Evropiane për të Drejtat e Njeriut.

Rizarta ka bërë të ditur se nuk do ta trajtojë më këtë çështje publikisht, duke paralajmëruar se situata do të ndiqet në rrugë ligjore.

Ndërkohë, nuk ka munguar as reagimi i menjëhershëm i gazetarit Elton Tozaj, i cili iu përgjigj publikisht paralajmërimit për ndjekje gjyqësore.

Përmes një postimi në “InstaStory”, Tozaj ka mbrojtur qëndrimin e tij, duke deklaruar se gazetaria investigative në showbiz nuk përbën shkelje në rastet kur raportimi lidhet me figura publike dhe ngjarje apo situata të zhvilluara në ambiente publike.

Ai ka theksuar se, sipas qëndrimit të tij, publikimi i materialeve që konsiderohen me interes publik nuk ndalohet vetëm për shkak se personat e përfshirë janë figura publike, duke e mbyllur reagimin e tij me një dozë ironie: “Të fala ligjeve!”