Një ngjarje e rëndë ka tronditur Hamburgun. Një grua 42-vjeçare dyshohet se në fillim të qershorit ka dërguar me postë një pako me pralina për djalin 20-vjeçar të ish-partnerit të saj.

Sipas informacioneve të publikuara nga BILD, ëmbëlsirat dyshohet se mund të kenë qenë të përziera me nitrat taliumi, një substancë jashtëzakonisht toksike. I riu e konsideroi menjëherë të dyshimtë pakon dhe njoftoi policinë, duke shmangur kështu një pasojë potencialisht tragjike.

Pas hetimeve të zhvilluara nga komisariati i vrasjeve dhe Prokuroria, gjykata lëshoi urdhër-arrest dhe urdhër kontrolli ndaj 42-vjeçares. Ajo u arrestua në banesën e saj në zonën Altona-Altstadt të Hamburgut, ndërsa akuza e ngritur ndaj saj është tentativë për vrasje.

Gjatë kontrollit të banesës, autoritetet gjetën edhe një substancë të dyshuar si helmuese. Për shkak të rrezikut, në vendngjarje u thirr menjëherë zjarrfikësja, ndërsa materiali u sigurua në një kontejner të posaçëm për substanca të rrezikshme.

Hetimet për rastin vijojnë, ndërsa autoritetet pritet të sqarojnë përfundimisht natyrën e substancës së gjetur dhe rrethanat e plota të ngjarjes.